பெயர்: பாவலர் மா.வரதராசன் பிறந்த நாள்: 07.04.1973 பெற்றோர்: மு.மாரி - மா.தனபாக்கியம் கல்வித்தகுதி: முதுகலை - தமிழ் (இரண்டாமாண்டு)

வழிகாட்டி ஆசான்கள்:	பைந்தமிழ்ப் பாவலர் மு.வே. கங்காதரன், முனைவர் இரா. திருமுருகன்
வெளிவந்த படைப்பு:	பாவலர் மா. வரதராசன் கவிதைகள்
அச்சில் உள்ளது:	மலர்ந்தமொட்டு (பாவியம்)
வெளிவர இருப்பவை:	நற்றமிழ் மாலை, மகாகவி பாரதியார் பிள்ளைத்தமிழ்
முகவரி:	பி. 62/12, மவுன்ட்பேட்டன் தெரு, சத்தியமூர்த்தி குடியிருப்பு, மேற்கு சாபர்கான்பேட்டை, சென்னை-600 083.

உரூபா 500 பரிசு பெறும் பாடல் :

1.எங்கடமிழ்ச் சொல்லினிலை யிஃதென் றுயர்த்தியே
திங்கடொறும் கூறும் தெளிதமிழே - இங்குள்ள
தங்கத் தமிழர்க்குத் தம்மொப்பம் ஆங்கிலமாம்
எங்கடமிழ்ச் சொல்லினிலை யிஃது!
- பாவலர் காலையூர் நெய்தல்நாடன்.

வெளியீட்டுக்குத் தேர்வுபெற்ற பாடல்கள் (தரவரிசைப்படி):

2.எங்கடமிழ்ச் சொல்லினிலை இஃது; தமிழ்மறவர்
பொங்குதமிழ் காத்ததெல்லாம் போனதையோ - மங்காமல்
எங்குமிங்கே ஆங்கிலந்தான் எந்தமிழைக் கொல்லுதையோ
எங்கடமிழ்ச் சொல்லினிலை இஃது.
- கலைமாமணி புலவர் பூங்கொடிபராங்குசம்.

3.எங்கடமிழ்ச் சொல்லின் நிலையிஃதெம் இல்லமெலாம்
"அங்கிளு'ம் 'டாடி','மம்மி' 'ஆன்டி'யும் - அங்குமிங்கும்
எங்கும் 'டமிள'ாய் எதிலும் தமிங்கிலமாய்
எங்கடமிழ்ச் சொல்லினிலை இஃது.
- கலைமாமணி கோவி. கலியபெருமாள், அரியாங்குப்பம்.

4.எங்கடமிழ்ச் சொல்லினிலை யிஃதென் றியம்புதற்
கிங்குண் டியல்பான வேர்ச்சொற்கள் - பங்களித்துத்
தங்குதடை யின்றித் தழைக்கத் தடங்காட்டும்
எங்கடமிழ்ச் சொல்லினிலை இஃது.
- புலவர் தங்க. ஆறுமுகன், சென்னை.

5.எங்கடமிழ்ச் சொல்லினிலை யிஃதெனவே சுட்டிடவோ?
பொங்குகடல் நாடாண்ட பூந்தமிழ்தான் - மங்கிடவே,
இங்குளார் செய்கின்றார் என்பதனை நொந்துசொல்வேன்
எங்கடமிழ்ச் சொல்லினிலை யிஃது!
- புலவர் வ. சிவசங்கரன், திருக்கழுக்குன்றம்.

6.எங்கடமிழ்ச் சொல்லினிலை இஃதெனவே சொன்னலத்தைப்
பொங்குமுணர் வோடுசொலிப் போற்றிடுவேன்; - தங்குபுகழ்
இங்களித்து நாற்பொருளும் ஏற்றமுற வேயளிக்கும்
எங்கடமிழ்ச் சொல்லினிலை இஃது.
- கி. சிவகுமார், விருத்தாசலம்.

7.எங்கடமிழ்ச் சொல்லினிலை இஃதென்று போற்றியே
பொங்குதமிழ் என்றே புகழ்ந்தாலும் - இங்கிந்நாள்
சங்கமுற வாழ்ந்ததமிழ் தாழ்ந்தநிலை எய்திற்றே
எங்கடமிழ்ச் சொல்லினிலை இஃது.
- கு. அரங்கநாதன், வரிச்சுக்குடி.

8.எங்கடமிழ்ச் சொல்லி னிலையிஃது முன்னாள்முச்
சங்கத்தை வைத்துத் தமிழ்வளர்த்தார் - எங்குமிந்நாள்
மங்காத் தமிழ்கலந்த வேற்றுச்சொல் நீக்கிலர்
எங்கடமிழ்ச் சொல்லினிலை யிஃது.
- புலவர் த.தட்சணாமூர்த்தி, திரு.பட்டினம்.

9.எங்கடமிழ்ச் சொல்லினிலை இஃதென்றே சொல்லியழ
எங்களால் ஆகுமா ஏந்திழையே - உங்களினம்
பொங்கி யயழுந்து புலப்படுத்தி நில்லாக்கால்?
எங்கடமிழ்ச் சொல்லினிலை இஃது.
- ஊருணிப் பாவலன், சென்னை.

முன்னரே பரிசு பெற்றறோரின் பாடல்கள் :

1.எங்கடமிழ்ச் சொல்லினிலை இஃதென் றிதன்மாண்பை
எங்கும் விளங்க எடுத்துரைத்தும் - இங்குள்ளோர்
தங்குழந்தை ஆங்கிலந் தான்பயில வேண்டுமென்பார்
எங்கடமிழ்ச் சொல்லினிலை இஃது!
- புலவர் மா. சு. மணி, திருக்கழுக்குன்றம்.

2.எங்கடமிழ்ச் சொல்லின் நிலையிஃது நாட்டினிலே
எங்கும் தமிழில்லை என்பதுவே - பொங்குகிற
வங்கமெனப் பாய்ந்திடுமே வண்டமிழும் செம்மொழியே
எங்கடமிழ்ச் சொல்லினிலை இஃது!
- பாவலர் மா. வரதராசன், சென்னை -83.

3.எங்கட மிழ்ச் சொல்லினிலை இஃதென் றறியா தார்
மங்காத் தமிழோடு மற்றமொழி - எங்கெங்கும்
தங்குதடை யில்லாமல் தம்பேச்சில் தைக்கின்றார்
எங்கடமிழ்ச் சொல்லினிலை இஃது.
- வே.ச.திருமாவளவன், புதுச்சேரி.

4.எங்கடமிழ்ச் சொல்லினிலை யிஃதாய்த் தனித்தமிழை
sவங்கங் கடந்தும் வளர்த்தாரே! - சங்கையின்றி
இங்குள்ளார் பன்மொழியி னெல்லாச்சொல் லுங்கலந்தார்!
எங்கடமிழ்ச் சொல்லினிலை யிஃது.
- சிலம்பூர்க்கிழான், கள்ளக்குறிச்சி.

5.எங்கடமிழ்ச் சொல்லினிலை இஃதென் றெடுத்துரைத்துப்
பொங்குமுளம் நல்லதமிழ் போற்றுமுளம்! - மந்திரம்போல்
வெங்கொடுமை தீர்க்கும்! விடிவளிக்கும்! நின்றுலவும்!
எங்கடமிழ்ச் சொல்லினிலை இஃது!
- பைந்தமிழ்ப் பாவலர் சி.பெருந்தேவன், தவளக்குப்பம்.